No opnar Nasjonalt senter for yrkesfag
Regjeringa etablerer eit nasjonalt senter for yrkesfag i Molde. Det skal gi meir kunnskap om yrkesfaga, utvikle utdanningane og bidra til at fleire fullfører med fagbrev.
Over halvparten av norske ungdomar begynner på yrkesfag. Det er fleire enn nokon gong, og etterspurnaden i arbeidslivet er stor. Likevel er forskinga på fag- og yrkesopplæringa mangelfull.
– Arbeidarpartiet i regjering satsar på yrkesfaga. Då treng vi òg meir kunnskap om kva som verkar for å styrke kvaliteten. No opprettar vi dette senteret slik at vi kan få ut det fulle potensialet i yrkesutdanningane, seier kunnskapsminister Kari Nessa Nordtun (Ap).
Senter for yrkesfag skal vere eit nytt, nasjonalt knutepunkt. Det skal vere ein pådrivar for nytenking, og arbeide langsiktig med å auke relevansen og kvaliteten i fag- og yrkesopplæringa.
– Noreg treng fleire fagarbeidarar som kan løyse utfordringane Noreg står overfor. Då må vi ha yrkesfaglege utdanningar som er tilpassa behova i arbeidslivet, og som gir den einskilde moglegheiter, seier Nordtun.
10 millionar kroner
Regjeringa har sett av 10 millionar kroner i 2025 til etableringa av det nasjonale senteret. I etableringsåret vil 5 millionar kroner gå til å etablere drifta, og 5 millionar kroner vil gå til å setje i gang forskings- og utviklingsprosjekt.
– Det er avgjerande at utviklinga av yrkesfaga er tett kopla til dei raske endringane som både privat næringsliv og offentlege verksemder står i. For å lykkast med dette, skal senteret bidra til meir og betre samarbeid mellom aktørane innanfor utdanning og arbeidsliv, seier Konrad Lillevevang, leiar ved Nasjonalt senter for yrkesfag.
Senteret blir organisert som ei eining i Utdanningsdirektoratet (Udir), og lagt til Udir i Molde.
– Molde er godt eigna. Byen ligg i ein region med svært høg søking til yrkesfag, det er mange ulike bedrifter som har behov for fagarbeidarar, og ulike miljø som kan bidra inn med kompetanse til senteret, seier Nordtun.
Senteret skal vere for alle bransjar i heile Noreg og utviklast i tett samarbeid med arbeidstakar- og arbeidsgivarorganisasjonane.
– Eit tett og godt trepartssamarbeid er avgjerande for at vi skal lykkast med senteret, seier Nordtun.
Om Nasjonalt senter for yrkesfag
- Senteret skal drive systematisk innhenting og formidling av kunnskap og erfaringar for ein nasjonal kunnskapsbase om yrkesfag i utdanning og arbeidsliv. Senteret skal sjå på lokale, regionale og bransjevise utviklingstrekk, nasjonalt og internasjonalt, og arbeide saman med sentrale forvaltningsaktørar og partane i arbeidslivet om utvikling.
- Senteret skal kunne gjennomføre eigne forskings- og utviklingsprosjekt i samarbeid med relevante aktørar innanfor utdanning og arbeidsliv. Senteret skal fungere som ei koplingsboks for samarbeid mellom ulike miljø innanfor yrkesfaga nasjonalt og internasjonalt.
- Gjennom systematisk tilrettelegging av kunnskapar og erfaringar vil senteret bidra til å støtte opp om arbeidet på skule-, bransje- bedrifts- og verksemdsnivå.
- Senteret skal mellom anna ha som mål å styrke samarbeidet mellom fag- og yrkesopplæringa og høgare yrkesfagleg utdanning. Partane i arbeidslivet vil vere representerte i eit råd som vil gi tilrådingar om prioriteringar og oppgåver til senteret.